تعرفت على زوجتي في الفيسبوك وكانت صغيرة.. تبعوا معايا تفاصيل قصة زواجنا

قبل 03 سنوات تعرفت على وحدة فلفيسبوك عندها 18 سنة وعجبتني عقليتها كانت متربية وعاقلة.. فحياتي مشفتش طفلة كيفها.. ومام هي تعلقت بيا.. كنت كبير عليها بزاف.. بيناتنا 19 عام بصح العمر مجرد رقم..

خممت مليح وقلت نخطبها ونشوف زهري.. ستنيتها حتى كملت الباك وخطبتها وعاونوني اهلها فلشرط.. وجابت الباك ودرنا العرس وديتها لدراي..

كانت طفلة عادية فلجمال.. بصح اخلاقها وتربيتها كانو هايلين.. سقسيتها اذا تحب تكمل قرايتها قاتلي منسمحش في داري..

وهكاك كنا عايشين عادي كنت نروح نخدم نخليها فلدار نجي نلقا الفطور واجد والدار نقية كانت كنز بالنسبة ليا حتا نهار رفدت بالكرش..

زيدت 2 ذراري توام.. فرحنا مع بعضنا بزاف..

جازت فترة الحمل  نهار راحت تولد 💔 ماكنتش بعاها بحكم خدمتي ..

عيطولي فلتيلفون من السبيطار وقالولي مرتك توفات..

منحكيلكمش على الشعور لي حسيتو.. تمنيت نموت انا ومتموتش هي..

حسيت روحي انا سباب موتها..

عشت معاها عام ونص وكانو اجمل ايام حياتي.. بصح هاذي هي الدنيا …

رجعت من بعدها نكره ندخل داري.. نحس الدنيا ظلمة..

وليت منقدرش نقعد في داري.. وديما تجي في بالي ضحكتها..

لحد الان مازالني متفكرها.. تمنيت تكون معايا ونربو ولادنا كيف كيف..

بصح مكتوب ربي.. ادعولها بالرحمة.. اليوم عيد ميلادها 20 سنة 💔🥀