قالي يا تحبسي الخدمة أو نطلقك.. قصة من الواقع المرّ !!

أنا استاذة مرسمة.. في بداية زواجنا راجلي وافق على خدمتي وقالي مادام في التعليم نورمال..
سكنا مع دارهم.. عندو إيطاج وحدو ماهوش مفيني غير الشومبرة..

كان طول الوقت يمعنيلي باه نتعاونوا ونفينوا الايطاج وأنا ماكنتش نرد عليه خاطر كنت حاطة سكن عدل..
ناضت يماه عمرتلوا راسو قالتلو واش جاك من خدمتها واش استفدت.. مرتك تظل هاملة وشهريتها تصرفها غير على عمرها..
وأنا كنت نصرف على روحي وعلى اولادي ونخلّص الاقساط نتاع السكنة.. وهو دراهمو ( شهرية قليلة ) في يد يماه تصرف منهم على بناتها..
حتى وحد النهار قالي ياتبطلي الخدمة يا نطلقك خيري أنا كنت موجدة روحي لهذا الكلام جاوبتو قلتلو نبطل الخدمة مستحيل نعيش بلا بيك و رحت حطيت ملف استيداع لمدة عام ( قلت حتى نشوف واش يصرا)و هو قلتلو راني حبست الخدمة باه ماطلقنيش
السيد فرح خاصة بعدما لحق الدخول المدرسي سبتمبر 2021, و شافني صح بطلت كشر عن أنيابه و رجع يعاملني معاملة قاسية سب و شتم لأتفه الاسباب و حرمني من المصروف قرعة شومبوا اشتقت نكسبها و أنا ساكتة و حامدة ربي آني حطيت استيداع ماشي استقالة و عجوزتي تضحك من عينيها و تستشفى فيا هي و بناتها قالتلهم ذرك تولي كي الطلابة
كان غير بابا يعاون فيا و يكسيلي اولادي و حتى الشطر الرابع و الموثق و المفتاح نتاع السكنة هو خلصهملي
لما لحق مارس 2022 تحصلت على السكن و خليت المفتاح عند بابا راجلي هبل وقالي هاتي المفتاح نتاع الدار نكريها لصاحبي نجيبوا منها مصروف و كي ماحبيتش ناض يهدد فيا بالطلاق قلتلو عادي نطلقوا بالتراضي
في سبتمبر 2022 تحصلت على الطلاق و رجعت لخدمتي و سكنت داري مع اولادي و أمي و ابي معايا
هو كي سمع بيا رجعت نخدم و آني حطيت استيداع ولا يقول خداعة خدعتني مابطلتش الخدمة و راه وين يمشي يهدر فيا هل ياترى صح أنا خداعة آني حطيت استيداع و مابطلتش خدمتي ؟